Patrick Diary

今日天氣唔係太好，因為就黎打風咁。好熱，係好悶熱。下午還落了幾場大雨。於是決定由原本石澳BBQ，變成清水灣的自助BBQ。

但係天氣真係風迴路轉。我地一行人去到中環的時候竟然天朗氣清。咁到最後都係去返石澳玩。

今次全部都係大學同學，有十個咁多，包括Mike, Joe, Vincent, MCC, Yee, Bonnie, Annie, Eric, PkAu and Me。我地去到筲箕灣到，分三批人出發，有些去買食物，有些去超級市場，有些就去石澳霸爐。

搞點晒後，我地就一行人去石澳。Annie & Bonnie一早同一家人有協定，話一個鐘後俾個爐我地。但係我地去到後，係群眾的壓力下，佢地一家好發就走。今晚真係好熱、好大霧，月光係橙色的，有d末日的感覺。

由於太熱的關係，都無乜食過野，以飲野為主。食食下，同Bonnie & Joe出去買酒飲，行左陣，吹左陣水。

返到去，就同Mike, Joe周圍望女仔，石澳真係一個多女仔ge地方。有一個女仔，仲獲得我們一致好評，真係勁!

之後，我地三條友玩浪，真係好玩。唔知係打風前夕，還是潮漲之時，d浪超級大，沖浪的感覺好特別。佢地七個就扮斯文，企晒係度。我地要狂拋沙去佢地果度，佢地先開始肯玩。到最後，買左個波玩，打左陣排球，雖然開波多過打波，但係都幾開心。

玩到咁上下，我同阿Mike終於成功將Annie姐，掉左落水，雖然Annie唔係好重，但係我地都好辛苦，因為要跑一段沙路先去到海邊。然後MCC無端端係岸邊，我地整埋佢濕身。玩到癲晒，真係勁累。

我地梳洗後，就出返旺角睇波。行晒全旺角的Bar，都無位，太旺了。最後，就去左Neway門口睇，葡萄牙win左，超開心。

食埋宵夜，就返屋企，佢地大部份人都搭火車。我同Mike, Eric就行返出去搭車。我就行返屋企。

今早阿儀in HSBC，佢本身要hae好多粒鐘，然後五點去in第二間公司。所以我就同佢係奧海城hae。點知佢firm左做先前請佢的CSL，咁就變左同佢腦輕鬆地玩。

去左奧海城食早餐(Deli France)、打機、hae、食lunch(魚米家)。打機真係抵，平到你唔信。係奧海城撞到Dorothy & Similar傾左一陣，佢地係度睇西餅for佢地係HSBC的last day。

之後，就去左金雞打桌球，真係超級hae打，打左一版，都打左勁耐。佢俾Annie拋棄，所以要返屋企。我就出發去尖沙咀join阿媽，係海港城食左超多野。

食完就出發去接我阿哥，搞到成八點。搭的士返黎旺角，去左泉章居食東江菜，超好味。

深夜，約了阿Philip仔去旺角睇波--捷克vs丹麥，唔係太好睇，都係有少少訓著咁。

六點幾開始訓，訓到三點幾。Good!好耐無訓得咁飽lu。訓完，食左個lunch(或者叫做tea)，然後就去海港城join 阿Joe買禮物。

沿路中，俾人對住我大叫粗口，叫我"X痕"，原來係我以前KFC的同事。事隔五年都記得我個名，真係有d感動。佢係一個同我同年ge女仔，估唔到五年後，竟然有一個兩三歲大ge仔。真係替佢個仔擔心，佢拖住個仔都咁夠膽講粗口。傾左幾句後，就走lu。佢唔相信我讀大學，再多一個人覺得我唔係讀書的。哈哈。

行到咁上下，嘉利大廈爆炸，封了一大段行人路。路人又塞滿行人路，真係麻煩。

幾經辛苦終於去到海港城。行左兩三個鐘頭終於買到了。跟住hae左陣，就返屋企食飯lu。

睇了荷蘭vs瑞典，沒有預期那麼精彩，但都十分緊張。等佢地射完十二碼，都天光lu。

訓左幾個鐘，阿媽話去清水灣行wor。咁就一齊出去。

今次行的是釣魚翁郊遊徑，途經五塊田、上洋山、下洋山、廟仔墩、釣魚翁山、田下山、大廟坳和布袋澳。整條路非常容易行，昆蟲都唔多隻。風景一流，可以望到清水灣、將軍澳工業村、柴灣和布袋澳。沿路有行多野百合，好像一個花園般。
Photo Album

走到郊遊徑的盡頭，便是大廟(即天后廟)，很大的一間廟宇，值得參觀。然後我們就走往附近的布袋澳，這兒有點像大澳，但沒有像大澳那麼商業化。我們到這兒走走，阿媽買了些海產和一些昆布。之後，我地就在這裡食飯，三個人都叫了很多野，非常好味。這兒的海鮮非常出名，晚上有很多人專程駕車來食飯。

晚上得知阿哥轉左工，會係呢幾日返黎香港，睇黎我又要執房lu。

因為Joe有朋友去新加坡，佢問我有無咩正and要留意ge地方，我就打左下篇文字，希望佢有用喇。之後我會update做網頁，加返些Photo入去。其實好早前都好想做呢樣野，不過hae到呢家。下面只是一小部份，如果你地想去新加坡，不防問下我，邊度是好去處，我都算一條地頭蟲。

去新加坡旅行，一定要帶傘，因為隨時係陽光普照的情況下，落大雨。
新加坡人說的是Singalish，跟"小孩不笨"所說的一樣，你大多可以用國語交流，和加插英語。

新加坡有很多東南亞的食品，有：
1) 福建炒蝦麵 (超級好味)
2) 炒粿頭--即係炒蘿蔔，有點像炒蛋餅，超好食
3) 海南雞飯
4) 水粿--蒸米糕，面頭加了些菜，超好食
5) 魚湯米線--魚湯一流
6) 咖哩魚頭
7) 喇沙(Katong Laksa)--一定要試，只可以用Spoon食，唔可以用筷子，因為要連湯一齊食
8) Otak--係新加坡式的魚餅，用竹葉包著，然後燒成的，很有魚的鮮味和竹葉的清香
9) 蒸魔鬼魚
10) 串燒(雞牛羊)乜都有，還有一種馬來人用竹葉包的飯，一齊食的
11) 豆品車仔面--所有選料都是黃豆類制品，很有特式
12) 印度薄餅(Murtabak)
13) 咖哩角
14) 刨冰
15) 五香炸物

基本上，1,2,3,4,5,6,9,11,14都可以係一般ge Food court找到，大部份都好正宗。
而想食正宗的7,8，就要去Dover, MRT station，轉巴士去Holland Village，一間招牌有個"山"字ge地方。這?還有一流的意米水(Barley)。
想食10，就要去Singapore River旁的Merlion Park，隔離的HSBC後面的老巴剎，有一流ge串燒食品，環境氣氣都一流。
至於12，就一定要去小印度，還可以喝著名的印度拉茶。
13，可以到一些伊斯蘭的廟宇，好像阿拉伯街(Arab Street)的temple附近就有很多。
要食15的話，可以去新加坡紅燈區附近的食肆。

還有新加坡人很喜歡喝蔗汁，非常平的，周街都買得到，可以當水喝。
烏節路(Orchild Road)中有很多賣雪糕的車仔，雪糕用餅或面包夾著，像一塊磚般，非常特別，可以一試。
另外，有一間麵包店叫Bread Talk非常出名，有一種用肉鬆包著的麵包，一試難忘。
最好，不要在新加坡食港式的食物，超級難食的，如：雲吞麵、燒鵝、叉燒等，難食到你唔信。

上面食品，我覺得1,2,7,8,10,12係一定要試的。


至於景點，大多都是Sentosa、牛車水(Chinatown)、小印度(Little India)、Orchild Road、Bugis、Safari。

Singapore River旁還有很多旅遊勝地，如：City Hall、Raffles Hotel等，還有很多Pub，氣氛很relax的。
Orchild Road有間商場叫義安城，?面有一間日本百貨公司買的野很特別，可以一看。
Mount Faber係Sentosa對面的，有隻Merlion(魚尾獅)，可以近距離拍攝。
虎豹別墅，也可以看看，跟香港的有點兒不同。
The Museum of Art係Singapore River的尾部，可以一看，很特別的，
晚上可以到Singapore River旁的Clake Quary，有很多東西買、食和睇。有一個賣土耳其雪糕的車仔，每一個朋友去完都會大讚的，有得食，有得睇。

傳統手信方便，可以在牛車水購買，如千里追風油、肉乾等。肉乾店有兩大家，一是林志源，二是美珍香。我建議買林志源的，因為比較特別和好味，香港也有美珍香，兩地是一樣的。
另外 Kaya也可以買作做手信，用來塗麵包的。

如果有時間，可以到一些Resort玩。如East Coast Resort，超舒服和乾淨，還可以試試新加坡式的BBQ。

有錢的話，可以坐船到印尼一遊，不過印尼只是一個非常窮的國家，沒有什麼好玩。最多也是買幾包蝦片。
到馬來西亞，可以報當地的Local Tour，幾百蚊港幣就可以遊雲頂、吉隆坡、馬六甲等。可以試試當地的肉骨茶和娘惹菜。

好辛苦先捱到兩點九睇波。一心諗住法國win梗，但係睇左半場，確有危機。成隊法國食晒豬油咁，節奏超慢。睇左半場都覺得勁悶。

好辛苦等埋下半場開始，睇左一陣，竟然昏迷左，仲要訓埋床都唔知。"紮"醒的時候，剛剛好是四點半，落床睇賽果，法國輸了。但係都無唔開心，佢地踢得真係唔好。

訓到九點幾，先後有三個人打電話黎問路，有一個超級路痴，竟然問我搭澳門船的碼頭，係唔係 係中環，佢仲要係中環搵左陣。經典。

中午時份起身，出發去太子join阿媽&親戚飲茶，諗住慳幾蚊行去太子。點知佢地勁無聊搭返車去旺角飲，我勁無聊地由油麻地行去太子，由太子搭地鐵返旺角飲茶。沿路中，嘉莉打電話黎，問我上次去赤柱搭咩車。睇黎今日，通勝可能話適宜郊遊la，咁多人出去玩ge。

飲完茶同表姊去左波鞋街買野，再次同兩個表侄玩，超累。不過都幾開心，佢地真係好聰明&好天真。返到屋企都八點半lu，老豆無端端買左幾支酒&花生，good!食飯時，我地兩個全部清晒佢。haha...

琴晚睇完波，訓左四個鐘左右，就有親戚黎我屋企。食埋野，就出發去將軍澳hae、傾計&食晚飯。

成日都好累好眼訓，但係就要同一班表侄玩。玩汔球都玩左成個幾鐘，佢地越玩越精神，我就越玩越hae。好彩，佢地最後食飯，唔再玩。如果唔係，我命都無。

食完飯，搭地鐵返屋企，全程訓覺。真係有少少"偶偶"地。

但係今晚，會繼續支持法國。

睇完德國vs捷克，無乜特別。德國真係輸左。我一向都唔鍾意德國波，所以都幾開心。

成個下午都好似無乜做過野咁，天氣真氣太悶熱，係屋企行來行去，hae來hae去，就返city打排波。

今次排球堂係最好玩ge一堂，一來換返一個正常ge阿sir，二來今次有比賽玩。上堂ge兩個小時，雖然有點累，但真係好正。

上完堂，同阿儀去左小城故事到食。果度d菜式，一定有個特別名，勁搞野。之後，食埋甜品，吹下水，hae下，就返歸lu。

返左屋企hae左幾個字，就出返旺角join Mike & Vincent睇波。場波要0245先開，我地又周圍走hae。又旺角行左去尖沙咀星光大道，hae左一陣，又行返去太子果邊睇波。條彌敦道差唔多俾我地行左兩次，有成8公里lu，真係健康。

我地去左間茶餐廳到睇，今晚有葡萄牙vs英格蘭。我地係成間餐廳，少數支持葡萄牙ge人。係果度，睇波氣氛都好好。場波真係超級好睇，非常之緊張。要睇到最後一秒先知結果。睇完場波後，我把聲都沙左少少，因為實在太開心lu。

睇完後，就各自歸家。返到屋企，老豆都起身lu，等埋佢洗完面，就一齊出去食早餐。我返到屋企，再沖埋涼已經七點半lu。天光光先開始訓。

係等老豆洗面ge時候，開始日出lu，無聊地影左幾張相。

琴晚太累了，無睇到意大利場波，真係有點兒可惜。

起身，就同阿媽去奧海城食lunch，食魚米家。返左屋企睇左陣書，Billy打電話黎食tea，再次去左奧海城到食，食左fruit house。

返到屋企，睇完新聞，就出左旺角join Rita, Karon, Pauline and 阿琪食晚飯聚舊，今次去左奧海城ge大薯小廚食，食左一個吉列豬扒芝士闊條麵，都ok抵，因為超級多肉。Pauline食唔晒，俾左半塊雞扒我。我呢一晚食左超級多肉，飽到上心口。

食完後，去左奧海城一期打機，果度打機真係超級抵，俾出面平成半，仲要係無煙味的。打左舖，就返去奧海城二期ge許留山食甜品。之後，就各自歸家lu。

奧海城真係一個好hae ge地方，照顧了我一日四餐。

琴晚，睇左上半場英格蘭+下半場法國。兩場波賽果都好正路，英法一齊晉身八強。

訓左一陣，食左隻"種" & lunch。就出發去鑽石山join 儀、Pk AU、Mike、Joe和Vincent去西貢榕北走廊行山。

榕北走廊係榕樹澳至北潭涌的一段山路，唔係太辛苦。不過沿路超多大蜘蛛，我地勁用紙巾、樹葉、樹枝、石頭去玩蜘蛛，玩左好多時間。沿路中，每個人都耐耐會發出怪聲，因為見到好多唔同ge昆蟲。勁好玩!

去到榕樹澳附近，我地稍作休息，食左d野，飲左d野，就沿著海邊，走往西沙公路。景色真係唔錯，可是近黃昏。

我地行完全程，就返回市中心食晚飯。食左泰國野，個個都食到好飽。之後就周圍走走，最後去左西頁碼頭吹水& hae。

Hae到咁上下，就去廁所，預備散水。但Joe無端端失常，跳左入廁所對出的水池內，濕遍整雙腳，笑到我肚痛。

訓左幾個鐘，就去左奧海城食lunch，去左魚米家食魚腐米線，耐唔耐食一次，真係幾好。

食完，就去左佐敦補習。補完，好無聊地再去左奧海城食tea。八蚊就食左個多士，加杯奶茶。奶茶好有水準，除了平時ge Lipton茶包外，還加了鍚蘭茶包，幾特別。食完返屋企hae左陣，去左藍田補習。補習的時候，個靚仔訓足全場，佢阿媽都無乎，我全場同一個半死狀態ge人講書。好hae咁，我就賺左舊幾水。係講書途中，學到一個英文，就係crocodile tears。鱷魚係食野ge時候，會流淚釋放出鹽份。咁我地可以話人地流crocodile tears，即係話人地假慈悲。

搭車，返旺角，撞到阿麗，傾左一陣計。佢找到工lu，係廣告公司做business admin.，真係替佢開心。再行多幾步，撞到Gordon，又傾左一陣，有人話我變左樣。(無奈...)

返到屋企，都成十點半lu。先開始食我ge dinner，但係食極都好肚餓，最後煮多左個noodle食。

我感覺到我今晚ge生活又會loop多次lu。

琴晚，睇左荷蘭，佢地輸左場lu。

訓左一陣，就出發去東涌。主要目的係帶阿菲去我平時有魚ge地方。佢地全部人一早已經入左去lu，我同d同學就成點半先入到去。搞搞下，佢地去左白芒。我地就係機場度釣。我叫佢drive 架車黎接我地，佢扮晒聽唔到咁。

係白沙咀度，only得阿mike & 阿儀釣到魚。我、Joe & Vincent食白果。之後，因為有運沙船黎，我地只好轉去東涌碼頭，果度我同Vincent都有收穫，都係泥孟。但大部時間，我地都係餵魚，d魚唔係太開口，only啄。

釣到六點左右，我地就搭地鐵出尖咀，而阿儀就返屋企。我地去左巴西燒烤食dinner，靚女數目都不少，阿mike隻眼好忙，因為要左望右望，前望後望。食完，我地一行人就同阿Joe一齊買禮物，行左好多shop。最後去左海港城，但係變左死城了，全部關晒門。

Joe因為要返工，佢就走先。咁我地就去左老麥hae。因為夜晚要睇葡萄牙vs西班牙。好慘!兩點九先開波，d時間好難過。傾計間，原來Vincent都係KFC人，佢講ge "O.R."，真係陌生但感覺親切。佢唔講，我都唔記得lu。

Hae到咁上下，去左寶勒巷一間bar，呢間野真係好唔掂，入到去，有件連體怪獸唱走音歌。開波ge時候，竟然話無聲wor! Shit!

葡萄牙整場狂攻，Good!睇睇下，終於有聲，開心返，haha。

睇完，就各自歸家，我如常地行返屋企。路經果欄，諗住買d荔枝返屋企。但係太多人lu，都無心機睇，只好回家lu。沖完涼，六點幾先訓。

今早，俾阿媽"哦"到無覺好訓，佢猛話部冷氣機滴水，要我幫佢整。咁最後，只好極唔願意地起身搞。

晨早留留，野都未食，就拆開部機睇，唔知咩事。到最後，加左個兜俾佢就算lu。但係呢少少的工序，都搞左我幾個鐘，極無聊。仲要搞到我非常之累。

非常累之下，食左好多餐補充體力。

本身今日去南丫島玩的，但係Kammy臨時話做節，咁只好係屋企hae。去左商務睇書，本身諗住買本陳南祿的新書(本書係講佢去旅行的經歷)，非常之好睇。但係睇睇下都睇左成半，廢時買lu。陳南祿的書寫手法好輕鬆，讀者睇完會覺得好舒服。香港都有一個好出名ge人寫遊記，叫做也斯，佢係嶺南大學的教授，佢文筆真係太好了，我好多都睇唔明。不過文章中都有好多很到肉的句子。

發現到一本"鐵道建築散步"。一眼就很鐘意呢本書，係一本比較另類的建築書目，內裡還有很多一流ge圖片。太想買了，可惜要成$127。都係睇定d先。

晚上，繼續跟Kammy討論我photo album裡面ge人物。到最後，我終於問左Agnes，原來真係UST Civil的Winson。呢個世界真係細，咁都會俾佢見到熟人。

琴晚睇左少少法國vs克羅地亞，法國的表現真是令人擔心。

訓左幾粒鐘，就出發去我夢寐以求的昂船洲。我由細到大都好想到昂船洲，今日係第一次去。昂船洲除了貨櫃碼頭外，其實仲有好多野，如軍營、海軍基地、炮台，仲有好多好多。四年後，還會有一條全球最長的雙塔式斜拉橋，值二十七億的。

去到昂船洲後，路很難走。每段路都是斷斷續續的，旁邊更有很多大型的貨櫃車來來往往。所以去這個地方，最好還是有一輛車。

到達軍營附近，開始感到一種莫名的嚴肅。有一道道厚厚的石牆，是他們用來實彈演習的。

我們走的路並不多，因為太多"此路不通"的路牌。我們都摸不著頭腦，到底我們要去那兒。可能是建橋工程已經開始，我覺得昂船洲已經很亂。有很多政府設施已經荒廢，我想那些山路已經封掉，是沒有可能再走的。但偶然會看到山的高處有一些豪宅，我想大多是那些軍官的官邸罷了。

我們走晒可以走的路後，就各自回家，因為真是太累。如果早一年來這個地方，我想一定有更好的景象。

今日食完lunch就去左旺角，和舊同事打左場Snooker。太耐無打lu，球技差左好多，打左一板，都無心機lu。

待我地食埋tea，我就返city上排球堂lu。係油麻地地鐵站撞到Virginia，無見好耐lu，但係都無停低講野，大家都趕時間咁，只有邊走邊講左幾句。佢著到鬼死咁靚，可能又係做model影相。返到又一城，又撞到Ally，呢個人物真係無處不在，處處都在。

今次，上排波堂，轉左阿sir(因為之前果個阿sir添丁，請假wor)，係一個head coach，但係麻麻地，可能佢唔係專教排球喇。今堂，我如常同一個男仔pair，佢勁好笑，狂串魚旦，打打下見埋紅tim，到最後仲要腳抽筋，我真係忍唔住笑。點解一個sporty ge人，都會搞成咁?

打完波同Jess & 阿儀去左越南灣食野。話題中，提及Jess家姐的對象，看來某同學的阿哥已經成為目標。哈哈!

返到屋企，打電話約人行山，打左俾Annie。佢一如以往唔接我電話。唉!我咁大個仔都未成功打過電話俾佢，無論我用屋企電話、手提、人地ge手提，都係唔成功。之後ICQ見到佢，佢話我次次都係電視高潮的時候打俾佢wor。唉，鬼知咩?

約左幾個人，就開始我網上的生活。同小欖傾左陣，先知PolyU去Haeco的是三個男仔。勁唔開心呢！希望有其他U喇。我講左呢個消息俾Eric & 區柏基聽，Eric的反應係「唉，食長齋~~~」。這句男人的感慨，令我笑左成分鐘。區柏基就話盡人屎，係HA找靚女wor。看來，我同Eric兩個，每天都係對住電視城食飯ga la。

今次同左另一班friend去睇波，我地只係睇第二場(德國vs荷蘭)。所以我係屋企ICQ，hae到兩點半先出門口。佢地唔想飲酒，所以去左茶餐廳度睇。

德國今次都踢得唔差，荷蘭就麻麻地lu。第一球俾德國入左，真係唔知德國好運，還是荷蘭廢。荷蘭竟然無人封遠柱，白白睇住德國個波入。不過，荷蘭最尾都有雲尼斯達萊入左球靚波。

睇完，返到屋企已經五點lu。沖埋涼，都成六點先訓。

跟住十二點起身，食左個老麥，就返左City打壁球lu。Vincent教左我幾野，now都算識識地喇。咁多人一齊打，都好開心。

返到黎，睇左我半年前係上海買ge DVD。係馮小剛的"手機"，睇左一半only，因為太累lu。但係都幾好睇，故事講手機如何令人與人的關係起了極大的變化。呢套片係中國算係大制作，制作模式有點像西方，加入左大量的贊助商產品入劇?面，如中國移動、Motorola、BMW等。

今晚決定唔睇波lu，休息一晚。

去左旺區K.K. Bar到睇意大利vs丹麥。不愧為旺角最好ge bar，睇波氣氛俾蘭桂坊好幾百倍，比SoHO好千幾倍。靚女數目都多幾倍。飲左酒+nuts，$60落樓，都ok la。

意大利vs丹麥一戰，好似睇龍門表演咁，兩邊龍門超強。意大利龍門保方不愧為最型&最勁ge龍門。但係整體表現丹麥略勝一籌，意大利中場經常斷纜。無入球紀錄，真係多得個龍門lu。

瑞典一戰，拿臣真係上晒身咁，老人家都幾好波。抵佢地大勝5:0。

差唔多天光先訓覺，三點先起身。真係好hae ge 生活，食完tea，買下野，睇下報紙，再睇埋個新聞，已經七點。之後，就上網download野，download返d電視劇，download下d無聊game。

晚上，無聊得滯，找了阿儀同我玩孖寶兄弟，但係我個Mario行到，佢個Luigi郁唔到。搞搞下，都係give up左，繼續無聊ge網上生活。

今晚，第二場波有德國vs荷蘭。唔知德國會唔會又踢悶波呢?

去左蘭桂坊睇左兩場波，一場係瑞士vs克羅地亞，第二場係英格蘭vs法國。

第一場波差點兒俾佢悶死左，混戰一場，好在有個肥佬瑞士龍門俾我地笑下，唔係真係訓著。

第二場重頭戲，超好睇。法國係補時階段連入兩球，反敗為勝。施丹真係勁!!!而碧咸真係慘，又功神變成罪人。整場比賽亨利表現平平，但係皮里斯踢得唔錯。巴夫斯又超勁，救出碧咸的十二碼，但係佢無端端係比賽中食波餅，經典。

睇完兩場後都差唔多五點，一心諗住搭返架小巴出旺角，但係竟然收左工。只好一條友，搭叮叮去天后，轉小巴喇。返到屋企，沖完涼都六點幾lu。

起身，就三點鐘，食下d野就出去補習lu。今日去左三處地方補習，有藍田、調景嶺和佐敦。補習ge時候，都好累，d"靚"仔琴晚又有睇波，搞到個個到得返半條命咁。眼見佢地咁眼訓，我真係超級辛苦，勁難先頂到最後。

返到黎，食埋飯都十一點lu，又開始準備出發睇意大利vs丹麥。意大利今次話打進攻型足球wor，唔知會唔會超級好睇呢?

唉!琴晚葡萄牙竟然輸波，超唔開心。

可能係呢個原因，我今日訓到成下午兩點先起身。上網同阿濠ICQ左幾句，講下近排大家去邊到釣魚，佢話清水灣&西貢果邊都ok wor。至於我去開ge橋咀and半月灣果邊，就無乜魚wor。因為有人炸魚。shit!我就recommend返個馬灣俾佢。haha...我遲d可以做一個漁民。

由於肚餓，同佢傾左一陣就offline lu。食完野返黎，就update左個Photo album。主要update 左：
1.) 新年我地係維園搞年宵ge相，但係mainly係慶功宴。
2.) 我日常ge生活照 (will add more soon)
3.) 我d Friend ge 畢業相
4.) 中學生活相 (only a part, will update soon)
5.) Snapshot & Night View (a small part only)

我諗我遲多幾日，會加返d description落去，同埋加多d相落去。另外，大家可以加comment wor。

食完晚飯，去左旺角睇下d camp燈。都幾貴，要成二百蚊以上，都係睇定d 先。

返到黎ICQ，阿Mike同我講白泥ge去法，佢話元朗有小巴去wor。但係佢阿媽話果邊無乜魚釣ge。咁我都係諗清楚先lu...haha...

琴晚葡萄牙無左我的支持，慘敗左。今晚，為左對法國的支持，我去馬會交左支持費，廿蚊咁多，win左剛剛好earn一餐老麥。因為賠率係2.05。另外，今晚都係要親身支持，唔可以俾法國輸，所以約左阿旋係蘭桂坊度支持，呢家出發lu。

今日係ACM比賽的大日子，我地一行人1015就係地鐵站集合，然後一齊出發去BUHK。

去到後，我地一組(leader--陳熹、groupmate--Joe 同埋 我)就check下部機有無問題，做埋個熱身賽，得到第四名，然後就去食lunch。非BUHK學生係BU食野要收加一，shit!

Lunch後，比賽就正式開始。總共有六題題目，我一開始就揀了條spreadsheet做，寫左好耐code，I/O都未搞掂，超唔開心。但係如果俾多d心機落去係應該做到的。而另一題，係欄杆的題目，用左Leader recommend 的方法-slope，code左一陣，但都係無結果。而Leader主攻啤酒一題，係dynamic programming。佢submit左幾次，但係都係time limit exceed。好慘。而阿Joe就研究mapping，佢差唔多用晒所有時間溫書，無code過，經典。

比賽後，我地就去左一間酒樓食飯，d野食就麻麻地，服務態度都好差。我對BU的食肆無乜好感。

之後，就同阿Joe出左旺角買禮物，行左兆萬，行左好多間舖頭都係無心水。但竟然俾我地撞到阿Sa，佢當時都係周圍行，睇下d玩具。可能帶左帽的關係，無乜人認到佢。偶然都有少少fans，問佢拿簽名and拍照，但真係好少。我地兩個雖然有DC，但係都無走埋去影相，因為有點兒無聊。

落到黎，撞到阿欣，成日都係油尖旺撞到佢ge，有點邪。講左兩句，就同佢道別lu。我地就行左去Trendy Zone睇下有咩買，但結果都係無。咁心諗，去返新世紀買野，沿路中，再次撞到阿欣，更加邪。

去到新世紀果間shop已經close左，諗住第日先再去買，去老麥食杯雪糕先。點知老麥都關埋。只好去仙跡岩飲野。

飲到咁上下，就返歸hae lu。

食完lunch，繼續執下自己間房，進度都係十分之慢。今次係執下，食下野，聽下歌咁。結果都係未執晒。

之後，出街食左個tea，買埋六合彩，就join放工ge阿Joe出旺角買禮物俾某朋友。大家都無乜心水，之後就行左去新世紀廣場，見到有兩個target的，但係都仲未買，都係睇定d先，唔好咁急。

然後就搭火車返CityU，因為晚上有ACM比賽前最後一個gathering。我同阿Joe一早已經打輸數，心諗Dr. Poon一定唔會放我地做正選，因為我地經驗太少，本身又唔係勁。但唔知點解，我同佢都做左正選，真係令人百思不得其解。

咁我無端端就同陳熹,Joe一隊。之後，我地就傾下，明天大家準備d咩for比賽。晚上，去左南山食飯，睇左一陣電視，我地全部人都脫晒節，唔知d劇情去到邊。

今晚可能係我最早訓的一晚，因為明天1015就要集合去BUHK比賽。

起身，就和阿媽去左坑口，同舅父舅母飲茶。飲左超耐，成三個鐘頭都有。佢地東南西北都講，我就專注食野。差唔多由頭食到落尾，超級飽。

係飲茶中，Bonnie打電話黎話有公司請左佢，仲要係三間一齊請，佢最後揀左JP Morgan，都替佢開心。

之後，就同佢地睇樓，睇左蔚藍灣畔，但係阿媽好似唔係幾鐘意d間格，so求其看下就算lu。之後，就周圍行下，舅母無端端去買左一打西餅俾我食tim。

到咁上下，就搭地鐵返CityU，join阿儀。因為佢要印notes for interview，所以早左返去幫佢。印到咁上下，Jess都黎埋。搞到咁上下，我地就去sport complex，因為要上volleyball course。

果排球阿sir都ok好，只係細聲左少少。玩左成兩個鐘，都有少少累。佢地兩個女仔打到成隻手腫晒，我就完全無事，但係俾人老屈我執波多過打波，真慘。

之後，就出返旺角食牛腩粉，竟然係果度撞到Ally，有d驚嚇。食完後，我地就去左附近間糖水舖食甜品，我叫左芒果沙冰&芒果pancake，都幾好味。佢地就食左楊枝金露。

食完，送佢地搭車。

今日食完lunch，就執下自己間房，因為實在太亂太多野lu。執左一陣，掉左好多垃圾。但越執越無聊，之後都係hae下，坐下 or even 訓下。到最後，都係未執好的。

之後去左食個tea就返去ACM training。今晚我同Joe and 一個year-3的同group，但係yr-3果個無黎到，得返我和Joe。成為左最廢的組合。我地完成左一條好耐lu，不過run得太慢，改左佢好多次。我同阿Joe pair-programming，但係我永遠係driver果個。我地自己implement左好耐無寫ge binary search。都算勁ga la。但係到最後，都係敵不過時間，give up左。我又再次waste左五蚊搭車返CityU，食左五次Time limit exceed。極之無奈。

晚上，同MCC, Pk Au, Joe食老麥，傾計時笑到肚痛。MCC講佢去USA的經歷，最經典的是佢帶左百五蚊美金去，買左一條幾十蚊的C.K.底褲，我地狂研究下條底褲的作用，可能著左後，真係會勁d。

今日我地一行人去左梧桐寨玩。有Annie, Bonnie, 阿儀, 阿Mike, Eric & Vincent，我地約左一點，一點九先集齊晒全部人，開始出發。

今次係第一次同大學同學行山，都好好玩。我地搭由大埔火車站搭64K出發，係梧桐寨村落車。

行左一段路，去左第一站萬德苑，呢度係一個深山的道觀，起得好靚咁。我地係度hae左一陣，d女仔鐘意左個廁所咁，stay左係果度成幾個字，等到我地班男仔發悶。

之後，我地就沿住條山路，去左第一條瀑布--井底瀑。沿路中，有人非常之嘈，險象環生。井底瀑非常之靚，係果度好舒服，好大自然feel，同埋好涼爽。我地係果度影左d相，坐下，吹下水咁，非常開心。

但係Annie話要出返去補習，我地唔可以再行落下一個瀑布lu，有點兒唔開心。一來，之後會有一個全香港最長的瀑布；二來，我昨晚plan左成兩個鐘，睇左幾多web site，行得三成，好似有點兒浪費。不過，其實整個行程都好開心ge，d風景都好靚。

落左山後，我地行左九個巴士站，去到林村，食野&拋橙許願。我拋左兩次就成功lu。拋果一陣時，勁開心，笑到肚痛。阿Mike拋到得返橙皮，阿儀就對準架巴士拋，Bonnie就成個橙飛埋落我到，Vincent一野就拋中lu。

之後，我地就出返大埔與Annie會合，食dinner & 周圍hae。最後去到，海濱公園找了一個超級好hae的地方吹水。

最後，食埋個許留山就返歸lu，very happy。Bonnie, Eric & Vincent搭車出返火車站，我就諗住搭巴士出返旺角。Annie超級好人地陪我等巴士，但係等等下，無聊看下個牌，發覺尾班車好大機會己經走了(與Annie所講ge十二點幾尾班車大有出入)，於是我只好搭小巴去返火車站，搭火車返屋企。

今日終於"的"起心肝，執下電腦d files lu。Download返sem-B d notes，都download左好耐，係webct個d files最難download。最後，仲發覺sam kwong個web site已經死左，無得再download d notes。不過算喇，佢d 垃圾notes，不要也罷。

之後，再執下d相，幾個月的相無執過，勁亂。眼見Jess個photo album發展得咁好，我遲d都要upload返d相去我個album。hehe...

之後，落街買左一些d無聊野，就出發去補習lu。再次，入藍田補習，次次都好眼訓，係架MTR到訓著。補完返到屋企，整左d野食，差唔多十一點先食我的dinner。然後，就plan下明天行山的路?lu。

食完lunch，出左去買野。一開頭諗住去太子，點知行行下落雨，結果返轉頭去左海港城。

我之前係又一城PageOne見到一本Tim Burton的書(類似The nightmare before christmas)，無買到，但今日決定去買，係海港城的PageOne找左好耐，最後問個姐姐，先知道原來間間PageOne買的書都有少少唔同，唔係全部一樣。真係麻煩，要下次返九龍塘的時候再買過。

係街上面見到有Spiderman的poster，真係超想睇。雖然睇過第一集，覺得麻麻地，但係都好期待第二集的出現。我太鐘意睇呢一類ge片，總覺得Spiderman係d building之間飛來飛去，十分之型。

黃昏，我們一家就去左黃大仙飲表哥果一餐。去到極之多人，都無位打雀，結果同d表弟妹鋤大D。今日係警察表哥大婚之喜，佢地揀六月六日請飲，原來因為我表哥的編號係50366，故此揀左最尾兩個字做請飲日子。

呢一次飲好特別，因為實在太噪喇，有佢地d大學同學，又有八圍差佬係到，佢地玩到癲晒。另外，有d似黑幫請飲咁，耐唔耐就會有d軍裝上黎，賀一賀我表哥，非常特別。

可能係職業的問題，做差人比較活潑d。對上一次飲醫生表姊果一餐，係非常斯文的，大搞浪漫氣氛。

今次d菜式都唔差，幾好味。我地果圍飲左勁多酒，有拔蘭地&紅酒，d表兄弟姊妹都好飲得，Good!

返到屋企，仲high high地。

今日訓得太晏lu，食完飯，就返去做ACM training。

今日training ge 題目，唔係太難理解，不過諗唔到快的方法。驚佢run得太耐。結果我揀左一條質數的題目來做。

做題目的時候，都係hae下hae下咁。做做下，同區柏基&Joe吹水。我地個topic都係圍繞做placement會唔會有靚女。最後結論係，大家要互相找對方食飯，促進交流。我地有Joe中環HSBC的OL，PK Au柴灣的Doctor & Nurse，我就有電視城的靚靚姐姐。真係要促進兩岸三地的交流lu...hehe...(dreaming)
[晚上，阿Mike話要參與我地的交流活動，咁我地可以加埋奧海的HSBC。兩岸四地lu。日後，會唔會有泛珠三角呢?]

吹完，都係繼續做野，finally都做到條題目。但係run-time太長，俾個system reject左。就係咁，我waste左五蚊車錢，返到去get左4個complie error和1個time-limit exceed。呢個situation，我都give up左...唔做lu...haha...

晚上，久未露面ge阿菲打電話俾我，約我出海玩。嘩!真係感動。但係可惜我明天要去飲，唔得閒去玩。從傾計中，得知佢鐘意左釣魚。猛問我，邊到好玩，邊到多魚。講左幾個地方佢都唔識去。佢話下次，我做領隊wor。佢好似好興奮咁。

另外，提提大家千祈唔好買Pringles果隻椒鹽味薯片，超級難食，佢係唯一一隻，食到我要掉的薯片。

今日陪阿媽買禮物for我表哥結婚ge人情。由旺角行到去尖咀，行左勁耐，最後去左景福珠寶買左條項鍊，我覺得都幾靚ge。

買完之後，我就自己去睇下d魚桿，睇左一陣，無乜心水，所以空手而回。之後，就係旺角買左件衫就返屋企lu。

本身諗住manage一下電腦d files，但係因為懶，到最後都無做到。惟有下個星期先做喇。

晚上，阿媽拆開一封信，入面有d Hotel buffet的coupon。好似係三位送一位咁。佢先頭係到計下，平均一位幾多錢，計到平均一位都要二百幾後，我心諗佢應該會講"咁貴架?"。但係出乎意料地，佢講"我地成屋都係得三個人，d Coupon 都無用喇!"。我個心都沉一沉，真係要俾多d時間陪下佢地lu。

呢幾年，我同阿哥輪住離開屋企咁。阿哥之前出國讀Master，返到黎，我就去左新加坡。到我返到香港，佢又狂出國公幹。搞兩搞，我搬埋入宿舍。到我臨返屋企前，佢要去北京做一年野tim。

希望一年後，有唔同ge景象喇。

中午去左九龍灣，找Marco食飯。聽佢講placement d野都幾搞笑。睇佢，都應該學到唔少野，勁!

之後，就搭返車返旺角，到處行下，睇下有咩買，但係都無收穫。只好返屋企，訓覺。訓完，就開飯lu。Good~

跟住，狂睇電視，睇到十一點半。唉，真係退得休lu。

晚上，同小欖icq左幾句，佢已經係金管返左三日工lu。好充實咁。聽到都開心。第日約埋一齊睇波喇。

睇左成積lu，都算ok。"A" 都算豐收。

去左游水、跑步。正!開始覺得個body，靈敏度大大提升，完全受我控制。haha

返到屋企，沖完涼，整左d野食，開左罐汔水，Hae梗ge時候，阿Joe就打電話黎，問我食唔食dinner。因為夜晚要一齊返City，做ACM training。果時只係下午五點鐘。

咁我就行左落街，係奧海城join佢。但最後，都係無食到，返去train完先再食。

今日一整天都係食。早餐、午餐、Tea、晚餐、糖水、宵夜。食左好多，但係都好似好肚餓咁。

下午，無聊地用Visual Basic.Net rewrite 左一個六合彩ge program。大家可以玩下wor，但要有.Net framework先可以玩。

之後，夜晚就去左藍田，俾左d野食舅父，就去左隔離村補習。補習的時候，Annie & Bonnie 狂打電話炸我，原來Bonnie找功課印for interview。咁我補完習，就搭車返九龍塘幫下佢。返到去都成十點，又係dum我波鐘，無乜野做過。

搞完一輪，我就去太子買糖水返屋企，係旺角撞到阿欣，原來佢Summer仲住梗Hall。好似好開心咁。